Sambært nýggju bókasavnslógini skulu kommunur, ið ikki hava starvsfólk við hægri bókasavnsfakligari útbúgving ella bókavarðaútbúgving, gera avtalu við aðra kommunu um at veita fólkabókasavnstænastu til borgarar í kommununi.

Í gjár varð avtala undirskrivað við Runavíkar kommunu, sum hevur bundið seg til at veita okkum tænastur, sum eru lýstar í lógini, eitt nú ráðgeving um bókasavnsrakstur, bókasavnsskipanir, skráseting, innkeyp, kassatión, klassifikatión, leiting, vegleiðing, meting av tilfari og keldum og miðlan av bókmentaligur tilfari.

Tænasturnar fevna eisini um at stuðla undir, at fremja upplýsing, lærdóm, talgilda búgving og luttøki í mentanarlívinum og samfelagnum sum heild. Tænasturnar kunnu eisini fevna um t.d. at skipa fyri tiltøkum.

Avtalan er galdandi til 31. desember í ár, men verður sjálvvirkandi longd í eitt nýtt 12 mánaða skeið eina ferð um árið, um avtalan ikki verður uppsøgd.